Luke 1

Lukukafo Yesu hala ukuwa ya Tiyofilusidoka ya lufuwa i fulo edaibo ha

1Wenabane Tiyofilusiyo, nemo lufuwa me ya lufuwa i fulo hedowe. Hito. Lemo minonigu ya idafa oloto pi lumibo idafa ya hana apito oloto pido akaisati ya wenina nomudinakafo wati ha monolo houba-naba onona liyabo wenina lo oloto lomabo ha ayawa ya wenina muki hawa ukuwa wife loto lufuwa inune, loti holiyabo ya moda holiyane. 3Feto loto holiyaninako, nemo moda ayaidana oto idafawa muki hana apito oloto pidoti ya mama oto holimo yowoboma nenako, loto ya hemogunu holito li fefe-fefe loto lufuwa iyobo ya hitoto holito ha mono api hilibiyabo ya ona hula ne, loto holifefe lanane, loto hane kito ya lufuwa me ya iyowe. Wao.

Enisole makafo Sekalaiya lomuibo ha

5Ena Yudia wenina hiyabatina we wenaba Heloti hamenalalo yalo Goti sokila hi muwabo wenina ma onona hulitina naba ya Abiya wenina yauti we ma nebo huliya Sekalaiya ya olonafo huliya Elisabeti yagi ya Goti sokila hi muibo we wenaba Aloni yufa fibo yauti wena ne. 6Feito minaibo ya olonafo wanafo loiti ya Goti nomunalo ya lutina-hatina dowa lotiko minoti, Wenaba lo molaibo ha muki ya li meyalo molo-molo o minaito, lifimatina minámiye. 7Feto fe minaifa, ido Elisabeti ya heni-wena nenako, olufotina minámito, we kilofo wena kilofo molaiye.

8Ena wewa Sekalaiya sokila hi muwabo weninalagi onona hamenatina aito, Goti nomunalo onona li ne. Onona li neto, sokila hiyabo weninawa yasi hi-hi abo monatina li meyalo moloti, 9ido ladanuwa aibo hinaibo we huliya li oloto pinune, loto li mebe-maba oto noka hedogeto huliya oloto pinaibo we yamo ya ononawa linaiye, loti hedabo ya Sekalaiya huliya oloto piye. Oloto pito, ladanuwa aibo idafa hinowe, loto Wenaba fele huliyagi numuna nabau yau lulau yoiye. 10Lulau yoto ladanuwa aibo idafa hinaibo hamena yalo ya wenina muki nuba minabo wenina ya feka minoti Goti lomuti minae.

11Feto fe minato, ladanuwa aibo idafa hi-hi abo folomo onaleka yalo ya Wenaba enisolela ma oloto pi muiye. 12Oloto pi muito Sekalaiyakafo wa edoto ula ololo oto holi naba-naba muiye. 13Holi naba-naba muito, enisolekafo feto lomuibo, Sekalaiyao, holi homámaneyo. Goti ha lomuwanibo ha ya holi nenako, ologafo Elisabeti ya hipa ma hedanogolaiye. Hedageto ya huliya Yoni ne, loto molo. 14Ido oloto pinaibo yagunu luka-haka moda yowageto ake iyageto wenina muki ake naba-naba inigilae. 15Feto ato, Wenaba nomunalo wenaba minoto, no wainife ido li nomudina moninaibo no mafe ya námo, loto lo fuko edo. Emo ya olafo houmalau minanigu ya Goti Weuna Fele mino edoto lula-halau faitoto mino edanogolaiye. 16Feito minageto yakafo aliga Isilaeli wenina abi loti ya liwila oto li Wenaba Gotitinaloka idipinogolaiye. 17Ido Weuna Felekafo Elaiya mino edoto li auba i edaibo yaidana oto emo ya mino edageto, Wenaba u homu molo edanaibo we minanogolaiye. Wewa ya wenina lutina-hatina li elepa i betiyageto olufotinagi lutina-hatina mako molanigilae. Ido ha holiti holámoti abo wenina yagi lutina liwewe o betiyageto ya wenina mona fefe liboko molabo yaidana oti ha mono mona ya fefe loti molo minanigilae. Feto ya wenina lifefe lo betiyageto ya moda fefe loti minoti Wenaba hiyabala o minanigilae, loto lomuiye.

18Feto lomuito, Sekalaiyakafo ha liwila oto feto lomuibo, Igaidana oto ha ona lane, loto holinowe? Nemo we kilofo moloto olonefogi ayaidana oto moda kilofo molainao, loto liye.

19Enisolekafo ha liwila oto lomuibo, Nemo ya Gebiliyeli, Goti nomunalo sinoito mino-mino owe. Feto feyoto, emo yakafo, hawa ukuwa dowa loto lomuwo, loto hemodoka nilifi molaito, lumuto lohomowe.

20Ya holi mino. Hawa lohomobo hamenala ageto ya moda hulawa anaibo ne. Nefa, hawa lohomobo ya holi hiki ladámanibo yagunu onesa melokati ha ladámoto minanogolane. Ha ladámoto minageto ya hawa hulawa anaibo hamenalo ya hofa ha lanogolane, loto lomuiye.

21Feti lo neto, feka nuba minoti Sekalaiya hiyabala minabo wenina yasi fele huliyagi numuna naba lulau yau hamena fana ne, loti hatina loiti-loiti ki minae. 22Feto fe minato, aliga lumuto, ha lanaibo ogofuwámiye. Ha lanaibo ogofuwámoto mebe-maba yako o binako, weninawa ya feto loti holiyabo, Fele huliyagi numuna nabau yau idafa ma oloto pi muiye, loti holiyae.

23Ena sokila hibo onona hamenala hulito ya eimola numunalaloka liwila oto wiye. 24Uto minaito, aliga olonafo Elisabeti olufola houmalau nebo ne. Olufola houmalau neto ya igana faifu (5) yalo faluku oto minoto feto loto libo, 25Nemo heni-wena minobo yagunu wenina nomudinalo unelo holi minofa, onesa ya Wenabakafo wa nedaibo hamenalo ya unelo holiyobo ha ya li fulo nedanowe, loto ya feto fe nedaibo ne, loto liye.

Enisolekafo Malia oloto pi muibo ha

26Ena iganala sikisi (6) yalo ya Gotikafo enisolela Gebiliyeli ilifi molaito, Galili mikalo Nasalete numudo wiye. 27Uto yalo ya olu we liyámabo olu huliya Malia ya aidena wehudi Defiti yufa fibo we ma huliya Yosefe wa molo edabo olu nedo lo fediye. 28Loto oloto pi muto feto lomuibo, Dowae, Wenabakafo lula-halau dowa loto naba wa hedoto mino hedaiye, loto lomuiye. 29Feto loto lomuito, ha libo yagunu ya lula-halau hena naba-naba aito, Nena hama ne? loto hala loiti-loiti kiye.

30Hala loiti-loiti kito, enisolekafo feto loto lomuibo, Maliao, holi homámaneyo. Goti lula-halau dowa loto naba wa hedaiye. 31Ena ha ma lohumunowe. Holi mino. Aliga ya olufoka houmakau minageto ya hipaka hedananibo ya huliya Yesu ne, loto molo. 32Emo ya huliyagi we minanaibo ya akaisa nebo we Hipala ne, loti lanabo ne. Ido Wenaba Gotikafo awalafo holofala Defiti hiyaba we ononalama munogolaiye. 33Ido Yekopu yufa fibo wenina hiyabatina we wehudi minowa-minowa oto minoto hiyaba omo yonaibo ya ma huladámanaibo ne, loto lomuiye.

34Lomuito, Maliakafo ha liwila oto feto loto lomuibo, Nemo we makafo li uno nedámito minoboma nenako, ha lanibo ya igaida oto gedanaiye? loto loga o edaiye.

35Loga o edaito, enisolekafo ha liwila oto feto loto lomuibo, Weuna Felekafo hemodoka ageto ya akaisa nebo we aubala yakafo hamamuna yaidana oto li fito hedanogolainako, olufoka hedananibo ya Gotikafo fele ne, loto ido Hipane ne, loto lanogolaiye.

36Ido yako minámiye. Weninaka Elisabeti wena kilofo molotaibo ya heni-wena ne, loti lo edaboma nefa, onesa hipala houmalau nebo ya iganala sikisi (6) ya utaiye. 37Yagunu Goti yakafo idafa-adafa muki feto feyanaibo ya moda ogofunaibo ne, loto lomuiye.

38Feto loto lomuito, Maliakafo ha liwila oto feto loto lomuibo, Nemo Wenaba houba-nabala olu minobo ya wa nedane. Yagunu ha lanibo ya feto fe nedanaiye, loto lito ya enisolekafo fulo edoito wiye.

Malia ya Elisabeti nedo wibo ha

39Ena hamena yalo ya Malia sinoito obulalo Yuda wenina numunatina meya yalo aloko uto 40fedoto Sekalaiya numunalau yoto ya, Dowae, loto Elisabeti lomuiye. 41Feto loto lomuito, Elisabeti holibo hamenalo ayalo ya houmalau olufola nebo ya sato molaito, Weuna Felekafo Elisabeti lula-halau faitoto mino edaito 42Elisabetikafo su aubawagi feto loto fibo, Aiyo, wenao, wenipa muki yauti hemo Gotikafo wa hedoto li dowa lo hedaibo ne. Ido olufoka houmakau nebo hedananibo yagi li dowa lo edanaibo ne. 43Ido Wenabane olafokafo nemo minodo anibo ya nemo aifa wena ma minonako, neidafaito loto feto fe nedane? 44Yagunu holiyo. Hemo siyane, loto lonomanibo ya noka fefeluma holiyodo ayalo ya houmaneu olufone ake ito sato molaiye. 45Ido hemo Wenabalokati ha lohumibo ha ya hulawa anaiye, loto holi hikito muwanibo wena ya moda dowa ake i-i anibo ne, loto Elisabetikafo feto lomuiye.

Maliakafo libo ha

46Ena Maliakafo feto loto libo,

Neimo weune-lune-hane yakafo Wenaba huliya li faka loto ebola lo minowe. 47Ido Goti ya li nomune waibo we nenako, yagunu weuneu ya ake i-i minowe. 48Nemo ya aifa idafa houba-nabala olu efoma ya minofa, ido wa nedo dowa molainako, yagunu onesa meloti wenina muki hofawa minabogi ido oloto pinabogi yasi nemogunu holiti ya wenawa dowa holi minomo unaibo mona ya Gotikafo muiye, loti lo-lo o nedanabo ne.
49Aubafofo yawala yakafo idafa naba nemodoka li oloto pito, huliya fele nebo ne.
50Wenina muki hofawa minabogi ido aliga oloto pinabogi ya wewa holiya holinado milumatina holi-holi anaibo ne. 51Ido wewa anagunu auba ibo onona lito ya wenina weudina-lutina-hatinau eimotina hulitina li faka labo wenina ya li upato betito uwabo ne. 52Hulitinagi wenina minoti wenina hiyaba o betiyabo we ya hulitina li waka o betito, ido hulitina minámibo wenina efo yako ya hulitina li faka lo betibo ne.
53Ido inagunu fuliyabo wenina ya idafa dowa bito houmatina aifa, ido idafa wa nabo wenina ya emodokati idipi molaito, adinau idafa ma liyámoti uwabo ne. 54Isilaeli wenina houba-nabala wenina minonibo ya ade li faka loto milumate holibo ya minowa-minowa oto hala molámibo ne. 55Feito milumate holito Abalahamu yagi, yufa fibo weninala yagi ha lo molo ledaibo yagunu u ayalo ibo ya minowa-minowa oto nebo ne,
loto feto libo ne.

56Ena igana loitigi-makogi (3) yalo Malia ya Elisabetite maina minoti eimola numunalaloka liwila oto wiye.

Yoni oloto pibo ha

57Ena Elisabeti hamenala aito ya hipala hedaiye. 58Hipala hedaito, selo keloti minabo wenina, ido weninala malekama minabo holiti ya, Aiyo, Wenabakafo milumala naba-naba holibo mona emodoka li oloto piye, loti emogi ake naba iyae.

59Ena yaloti fo hamena eiti (8) wito yalo ya hipa ulau Goti anela fukanune, loti nuba oti melafo Sekalaiya huliyalo abalafo ne, loti molanune, loti lafa, ido 60olafokafo libo, E'e, huliya Yoni ne, loti molalo, loto lobiye. 61Lobito, emotinasi ha liwila oti feto loti lomuwabo, Aiyo, weninatina yauti ma hulitina yaidana ma minámima ne, loti 62melafo Sekalaiya ya mebe-maba oti hipala huliya molanaibo yagunu loga o edae. 63Loga o edato, emokafo lufuwa inaibo idafa numunae, loto mebe-maba aito liti muwato, Huliya ya Yoni ne, loto lufuwa ito ya hatina abi kiyae. 64Ido ayalo wela huluma li hotito ha loto Goti ebola liye. 65Ido selo keloti minabo wenina muki ya wetina lauwa opaiye. Ido Yudia eba naba obulalo-obulalo yalo idafawa yagunu loyolalo-melo omo uwae. 66Feto fe minabo ya hawa holiyabo wenina muki yasi lutinau holiyabo ya Wenaba aubala mino edaibo ne, loti holiyabo yagunu feto loti labo, Hipa yakafo naba lito igaida we minanaiye? loti feto lo minae.

Sekalaiyakafo Wenaba ebola libo ha

67Ido melafo Sekalaiya ya Weuna Felekafo lulau mino faitito ya Goti welaloti ha feto loto ya libo,

68Wenaba ya Isilaeli wenina Gotite ebola lokelo. Emokafo ya weninalaloka loto meina fi ledoto nalauti wina ledaiye. 69Feto fe ledoto houba-nabala we Defiti yufa fibo yauti li nomude wanaibo we auba ibo we ya li oloto pi ledaibo ne. 70Feto fe ladanowe, loto eimola hala ya aidenati polofetila fele we wetinau ya molaito feto loti labo, 71Goti yakafo li nomudina wanowe, loto uwotefo-mota adinau yauti, ido
wenina lutina-hatinau nosámibo holi lumunabo adinau yauti li nomude wanaibo ne, loti labo ne.
72Feito Gotikafo awatefo holofate-mota ya milumatina holito, emogi li hutifina ledaibo hala fele nebo ya hala molámibo ne. 73Gotikafo awatefo Abalahamu ya auba ito lo gedibo hawa ya feto libo, 74Uwotinafo-mota adinaloti li nomudina wa oto holitina holámoti, huline li faka loti lutina-hatina numuti, mikalo minabo hamenalo yalo mona fefe lotiko molanabo ya fele wenina mino-mino anae, loto lo molaibo ne.
76Ido heimo, olufone ya hemogunu akaisa nebo we polofetilae, loti lanabo ne. Hemokafo Wenaba moninaibo hanu ya wili edanowe, loto homu molanane. 77Homu molananibo ya Wenaba lifimate hilili o ledoto li nomude wanaiye, loto weninala lobi-lobi anogolane. 78Feito Gotite weuna-lula-halau yau milumate holibo ya fo yaidana oto lamena lumunaibo we ya okulumalo akaisati lemodoka ya ilifi molanaiye. 79Wewa yakafo lemo wenina midipu igu minoto fulinubo hamena yagunu holi holiyonibo ya lamena o ledoto, you amena mona ya api lilibinaiye, loto ilifi molaiye,
loto Sekalaiya libo ne.

80Ido hipawa naba lito, weuna-lula-hala ya auba ibo yoito, uto hafali mikau yau minomo uto, aliga Isilaeli wenina nomudinalo oloto pi betibo ne.